सत्तारूढ दल एमालेको विपद् व्यवस्थापन विभागले सरकारको ध्यानाकर्षण गर्ने तयारी
काठमाडौँ – नेकपा (एमाले) को केन्द्रीय विपद् व्यवस्थापन तथा स्वयंसेवा विभागले चाडपर्वको समयमा जनताले सहज र सुरक्षित रूपमा पर्वहरू मनाउन सक्ने वातावरण निर्माणका लागि सरकारको ध्यानाकर्षण गराउने तयारी गरेको छ। विभाग प्रमुख खिमलाल भट्टराईले कार्यवाहक प्रधानमन्त्री प्रकाशमान सिंहलाई भेट्ने र चाडपर्वका बेला सुरक्षा, यातायात, र बजार व्यवस्थापनका विषयमा आवश्यक पहल गर्न आग्रह गर्ने जानकारी दिएका छन्।
नेकपा (एमाले) को केन्द्रीय विपद् व्यवस्थापन तथा स्वयंसेवा विभागले दसैँ, तिहार, नेपाल संवत्, छठ, र इदजस्ता प्रमुख पर्वहरूको सन्दर्भमा जनताले सुरक्षित वातावरणमा चाडपर्व मनाउन सरकारलाई सक्रियता देखाउनुपर्नेमा जोड दिएको छ। भट्टराईले चाडपर्वका समयमा सडक, यातायात, र सार्वजनिक स्थानहरूमा हुनसक्ने भीडभाड र सम्भावित अवाञ्छित गतिविधिहरू नियन्त्रण गर्न स्थानीय प्रशासनलाई सक्रियताका साथ परिचालन गर्न अनुरोध गर्ने बताएका छन्।
विभागले विशेषगरी चाडपर्वको अवसरमा अत्यधिक मदिरा सेवन, जुवा खेल्ने, आतिसबाजी गर्नेजस्ता अवाञ्छित क्रियाकलापहरूको रोकथामका लागि सुरक्षा निकायलाई कडा रूपमा परिचालन गर्न आवश्यक रहेको बताएको छ। विभाग प्रमुख भट्टराईले भने, “हामीले सरकारले यो अवसरलाई व्यवस्थित रूपमा मनाउन जनताको सहजीकरण गर्ने विश्वास गरेका छौँ।”
चाडपर्वका समयमा बजारमा मूल्यवृद्धि, खाद्य सुरक्षा, र यातायात सुविधाका विषयमा सरकारले प्रभावकारी कदम चाल्नुपर्नेमा पनि जोड दिइनेछ। यातायात व्यवस्था र सडक मर्मतसम्भारलाई चुस्त बनाउन र यात्रा सुरक्षित बनाउनका लागि आवश्यक योजनाहरू लागू गर्न सरकारलाई सुझाव दिइनेछ।
नेकपा (एमाले) को यो पहलले चाडपर्वका बेला जनताको सुरक्षा र सहजता सुनिश्चित गर्न सहयोग पुर्याउने विश्वास लिइएको छ। सरकारले स्थानीय प्रशासन र अन्य निकायलाई थप सक्रिय बनाउन सुझाव पाउँदा जनताले सुरक्षा र सहजता अनुभव गर्ने अपेक्षा गरिएको छ।
इप्रेस मिडिया
असोज ११, २०८१