काठमाडौँ, चैत्र १८, २०८१
ईप्रेस संवाददाता
अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनमाथि तीव्र आक्रोश व्यक्त गरेका छन् । युक्रेन युद्धविरामका लागि एक साता लामो प्रयासपछि एनबीसी न्युजसँगको फोन अन्तर्वार्तामा ट्रम्पले पुटिनले युक्रेनी राष्ट्रपति भोलोदिमिर जेलेन्स्कीको विश्वसनीयतामाथि अनावश्यक प्रश्न उठाएर समस्या निम्त्याएको बताए ।
ट्रम्पले रुस युद्धविराममा सहमत नभए उसको तेलमा ५० प्रतिशत कर लगाउने चेतावनी दिए । “युक्रेनको रक्तपातपूर्ण अवस्थाको अन्त्य नहुनुको जिम्मेवार रुस हो भन्ने लागेमा म कडा प्रतिबन्ध लगाउन तयार छु,” उनले भने । राष्ट्रपति निर्वाचित भएदेखि नै युद्धविरामको पहलमा जुटेका ट्रम्पले यसअघि युक्रेनलाई दबाब दिँदै आएका थिए, जसले गर्दा उनलाई रुसप्रति नरम भएको आरोप पनि लागेको थियो । तर, यो पटक उनले पहिलोपटक रुसलाई यति कडा चेतावनी दिएका छन् ।
अन्तर्वार्तामा ट्रम्प पुटिनसँग निकै रिसाएको देखिए । उनले जेलेन्स्कीलाई पनि ‘तानाशाह’ को संज्ञा दिँदै आलोचना गरे । जेलेन्स्कीले युद्धविराम वार्ताको बहानामा युक्रेनको निर्वाचन स्थगित गरी आफ्नो सत्ता लम्ब्याउने प्रस्ताव राखेको ट्रम्पको भनाइ छ । यो कदमले युक्रेनमा राजनीतिक अस्थिरता बढ्ने सङ्केत गरेको छ ।
यो घटनाले ट्रम्पको युद्धविराम प्रयासमा नयाँ मोड आएको छ । रुस र युक्रेन दुवैमाथि उनको दोहोरो दबाबले वार्ताको भविष्य अनिश्चित बनेको छ, भने रुसी तेलमाथिको सम्भावित प्रतिबन्धले विश्व बजारमा ठूलो प्रभाव पार्न सक्ने अनुमान गरिएको छ ।
