काठमाडौं, चैत्र १५, २०८१
ईप्रेस मिडिया
काठमाडौं– गृह मन्त्रालयले शुक्रबार (चैत्र १५) काठमाडौंमा राजावादी प्रदर्शनकारीले मच्चाएको अराजकतालाई २०६१ भदौ १६ को घटनासँग तुलना गरेको छ। मन्त्रालयले यो घटनालाई इराकमा भएको अराजकताको जस्तै प्रकृतिको भनेर टिप्पणी गरेको छ।
गृह मन्त्रालयका सहसचिव छवि रिजालले भने, “यो घटना २०६१ भदौ १६ जस्तै प्रकृतिको देखियो। २० वर्षपछि फेरि त्यस्तै अवस्था दोहोरिएको छ। त्यतिबेला अराजक समूहले यस्तो गरेको थियो भने अहिले निश्चित उद्देश्य बोकेको समूहले यो काण्ड मच्चाएको छ। यसबाट भएको क्षतिको जिम्मेवारी आयोजकले लिनुपर्नेछ।”
पृष्ठभूमि
२०६१ भदौ १६ मा इराकमा १२ नेपालीको हत्या भएको घटनापछि काठमाडौंमा आगजनी, तोडफोड र लुटपाट भएको थियो। त्यसको पाँच महिनापछि तत्कालीन राजा ज्ञानेन्द्रले सत्ता हत्याएका थिए। आजको प्रदर्शनमा पनि राजावादी समूहले तीनकुने क्षेत्रमा जडीबुटी कम्पनी, अन्नपूर्ण पोस्ट दैनिक र नेकपा (एकीकृत समाजवादी) को कार्यालयमा आगजनी र तोडफोड गरेका छन्।
मन्त्रालयको भनाइ
मन्त्रालयका अनुसार २०६१ को घटना अज्ञात अराजक समूहबाट भएको थियो भने अहिले राजसंस्था पुनर्स्थापनाको माग राख्ने समूहले सुनियोजित रूपमा यो अराजकता मच्चाएको छ। सहसचिव रिजालले यो घटनालाई नियन्त्रण गर्न कर्फ्यु र सेना परिचालन गरिएको बताए। “हामीले स्थिति नियन्त्रणमा लिन कडा कदम चालेका छौं। आयोजकले यो क्षतिको जवाफदेही लिनुपर्छ,” उनले थपे।
यो प्रदर्शनमा एकजनाको मृत्यु भएको छ भने ठूलो संख्यामा घाइते भएका छन्। काठमाडौंको ट्राफिक व्यवस्था प्रभावित भएको छ र सर्वसाधारण त्रसित छन्। गृह मन्त्रालयले थप अनुसन्धान र कारबाही अघि बढाउने जनाएको छ।
