काठमाडौं, चैत्र १५, २०८१
ईप्रेस मिडिया
काठमाडौं– राजावादी आन्दोलनका कमान्डर दुर्गा प्रसाईंविरुद्ध नेपाल प्रहरीको केन्द्रीय साइबर ब्यूरोमा उजुरी परेको छ। ‘मायाको पहिचान नेपाल’ नामक संस्थाले प्रसाईंले यौनिक तथा लैंगिक अल्पसंख्यक समुदायलाई लक्षित गरी घृणास्पद अभिव्यक्ति दिएको आरोप लगाउँदै उजुरी दर्ता गरेको हो। साइबर ब्यूरोका प्रवक्ता एसपी दीपकराज अवस्थीले उजुरी शुक्रबार प्राप्त भएको पुष्टि गर्दै भने, “आज उजुरी दर्ता भएको छ। अब कानुनी प्रक्रिया अघि बढाउँछौं।”
उजुरी ‘मायाको पहिचान नेपाल’ का कार्यकारी निर्देशक सुनिलबाबु पन्तले दिएका हुन्। प्रसाईंले सामाजिक सञ्जाल र सार्वजनिक मञ्चहरूमा अल्पसंख्यक समुदायविरुद्ध गलत सूचना र घृणा फैलाउने अभिव्यक्ति दिएको उजुरीमा उल्लेख छ।
प्रदर्शनमा तोडफोड र आगजनी
उजुरी परेकै दिन प्रसाईंकै कमान्डमा काठमाडौंको तीनकुने क्षेत्रमा राजावादीहरूले गरेको प्रदर्शन उग्र बनेको छ। प्रदर्शनकारीले सार्वजनिक सम्पत्तिमा तोडफोड र आगजनी गरेका छन्। कोटेश्वरस्थित जडीबुटी कम्पनी लिमिटेड परिसरमा आगो लगाइएको घटनाले सवारी साधन जलेर नष्ट भएका छन्। सामाजिक सञ्जालमा फैलिएका तस्बिर र भिडियोमा आगलागीको दृश्य स्पष्ट देखिएको छ।
कर्फ्यु लागू
प्रदर्शन हिंसात्मक बनेपछि काठमाडौं प्रशासनले स्थिति नियन्त्रण गर्न कर्फ्यु जारी गरेको छ। प्रहरीले प्रदर्शनकारीलाई तितरबितर पार्न बल प्रयोग गरेको छ भने उपत्यकामा ३५,००० भन्दा बढी सुरक्षाकर्मी परिचालन गरिएको छ। काठमाडौं उपत्यका प्रहरी कार्यालयका प्रमुख एआईजी टेकबहादुर तामाङले भने, “सुरक्षा व्यवस्था कडा बनाइएको छ। तोडफोड र आगजनीमा संलग्नलाई कानुनी दायरामा ल्याउँछौं।”
आजै काठमाडौंमा गणतन्त्रवादी र राजावादी समूहले छुट्टाछुट्टै प्रदर्शन गरेका थिए। गणतन्त्रवादीहरूले प्रदर्शनीमार्गमा सभा गरे भने राजावादीहरूले तीनकुनेमा प्रदर्शन गरेका थिए। दुई पक्षबीच तनाव नहोस् भनेर प्रहरीले ब्यारिकेड राखे पनि राजावादी प्रदर्शन उग्र बनेको हो। प्रसाईंको नेतृत्वमा रहेको यो आन्दोलनले राजतन्त्र पुनर्स्थापनाको माग गर्दै आएको छ।
प्रसाईंविरुद्धको उजुरी र प्रदर्शनको हिंसात्मक रूपले काठमाडौंको सुरक्षा र ट्राफिक व्यवस्थापनमा ठूलो चुनौती थपिएको छ। साइबर ब्यूरोले उजुरीमाथि छानबिन सुरु गर्ने र प्रशासनले प्रदर्शनकारीमाथि कारबाही अघि बढाउने तयारी गरेको छ।
