काठमाडौं – राष्ट्रिय प्रजातन्त्र पार्टीका अध्यक्ष राजेन्द्र लिङ्देनले प्रतिनिधि सभा बैठकमा ठूला दलहरूको चरित्रकै कारण देश अस्थिरतातर्फ धकेलिएको आरोप लगाएका छन्। उनले गणितीय समीकरणभन्दा दलहरूको चरित्र सुधार नभएसम्म देशले स्थिरता नपाउने तर्क प्रस्तुत गरे।
लिङ्देनले विगतमा आफ्नो दलले दुई पटक केपी ओली नेतृत्वको सरकारलाई विश्वासको मत दिएको स्मरण गराउँदै भविष्यमा पनि आवश्यकताअनुसार सरकारलाई सहयोग गर्ने प्रतिबद्धता जनाए। उनले कांग्रेस-एमाले गठबन्धनलाई अन्तिम समीकरण नमान्न आग्रह गर्दै सबै दलबीच नवीन समझदारीको आवश्यकता औंल्याए।
संविधानका केही प्रावधान संशोधन गर्नुपर्नेमा जोड दिँदै लिङ्देनले समानुपातिक निर्वाचन प्रणाली र बहुदलीय व्यवस्था परिवर्तन गर्ने कुनै पनि प्रयासको राप्रपाले कडा प्रतिवाद गर्ने चेतावनी दिए। उनले दुई तिहाइको सरकार पनि ५ वर्ष टिक्न नसकेको उदाहरण दिँदै गणितले मात्रै स्थिरता नआउने बताए।
कांग्रेस-एमालेले दुई दलीय व्यवस्था ल्याउन समानुपातिक निर्वाचन प्रणाली संशोधन गर्न खोजेको भन्ने हल्लाप्रति लिङ्देनले आपत्ति जनाउँदै साना दललाई निषेध गरेर कस्तो देश बनाउन खोजिएको भनेर प्रश्न गरे।
