काठमाडौँ – नेपाल पञ्चाङ्ग निर्णायक विकास समितिले यस वर्षको विजया दशमीका लागि शुभ टीका ग्रहणको साइत असोज २६ गते बिहान ११ः३६ बजे उत्तम रहेको जनाएको छ। समितिका अध्यक्ष श्रीकृष्ण अधिकारीका अनुसार, दशमीका दिन बिहान ८ः३३ बजे देवी विसर्जनको साइत रहेको छ।
टीका ग्रहण गर्दा पूर्वतर्फ फर्केर बस्नुपर्ने परम्परा अनुसार, यस वर्षको दसैँलाई धार्मिक एवं सांस्कृतिक रूपमा विधिपूर्वक मनाउन समितिले विभिन्न साइत सार्वजनिक गरेको छ।
नवरात्रको साइत
यस वर्षको नवरात्र अर्थात् दसैँ असोज १७ गते बिहीबार घटस्थापनादेखि सुरु हुनेछ। घटस्थापनाको साइत बिहान ९ः१६ बजे रहेको छ। घटस्थापनापछि असोज १८ गते शुक्रबार बिहान ९ः१४ बजे पश्चिम मोहडामा झण्डा फहराउने साइत रहेको छ।
दसैँका अन्य प्रमुख दिनहरूको साइत
- असोज २२ गते मङ्गलबार पचलीभैरव यात्रा
- असोज २४ गते बिहीबार फूलपाती र श्री तुलजाभवानी यात्रा बिहान ७ः११ बजे सुरु हुनेछ, जबकि स्थिरासनको साइत बिहान ८ः४३ बजे रहेको छ।
दसैँ समापन र कोजाग्रत पूर्णिमा
दसैँको समापन असोज ३० गते बुधबार अखिलबलीपूर्तिसँगै हुनेछ। कोजाग्रत पूर्णिमा पनि यसै दिन मनाइने भएकाले यस दिनलाई दसैँको अन्तिम दिनका रूपमा मानिन्छ।
यस वर्षको दसैँलाई विधिपूर्वक र शुभ साइतमा मनाउन समितिले जनाएअनुसार, श्रद्धालुहरूले साइतअनुसार तयारी गर्न थालिसकेका छन्।
ईप्रेस मिडिया आश्विन ५, २०८१