काठमाडौँ, चैत्र १८, २०८१
ईप्रेस संवाददाता
नेपाल राष्ट्र बैंकले बजारमा नोटको आपूर्ति सहज बनाउन ५०० दरका २३ करोड थान नयाँ नोट प्रचलनमा ल्याउने प्रक्रिया सुरु गरेको छ । यसका लागि राष्ट्र बैंकले आइतवार एक सूचना जारी गरी अन्तर्राष्ट्रिय बोलपत्र आह्वान गरेको छ ।
राष्ट्र बैंकको मुद्रा व्यवस्थापन विभागले नोट छपाइका लागि योग्य आपूर्तिकर्ताहरूबाट गोप्य सिलबन्दी बोलपत्र पेस गर्न आग्रह गरेको छ । इच्छुक कम्पनीहरूले आगामी मे ३ तारिख (वैशाख २०, २०८२) सम्म कार्यालय समयभित्र बोलपत्र पेस गर्न सक्नेछन् । नोट छपाइको यो ठेक्काका लागि राष्ट्र बैंकले पूर्वसर्त पूरा गरेका छ वटा विदेशी कम्पनीलाई छनोट गरिसकेको छ ।
छनोटमा परेका कम्पनीहरू
राष्ट्र बैंकले नोट छपाइका लागि योग्य ठहरिएका कम्पनीहरूमा निम्नलिखित समावेश छन् :
- चाइना बैंकनोट प्रिन्टिङ एन्ड मिन्टिङ कर्पोरेसन (चीन)
- डेला रुई इन्टरनेसनल लिमिटेड (युके)
- गिएसेकी डेभिरेन्ट करेन्सी टेक्नोलोजी (जर्मनी)
- ज्वाइन्ट स्टक कम्पनी ‘गोज्नाक’ (रसिया)
- ओबेरथुर फिडुसिआयर एसएएस (फ्रान्स)
- पोलिस सेक्युरिटी प्रिन्टिङ वर्कस (पोल्याण्ड)
यी कम्पनीहरूले राष्ट्र बैंकले तोकेका मापदण्ड र पूर्वसर्तहरू पूरा गरेका छन् । यिनैमध्ये सबैभन्दा कम लागतमा नोट छाप्ने प्रस्ताव पेस गर्ने कम्पनीले ठेक्का पाउनेछ ।
राष्ट्र बैंकले ५०० दरका नोटको ठूलो सङ्ख्या छाप्न लाग्नुले बजारमा नगदको मागलाई सम्बोधन गर्न खोजेको देखिन्छ । पछिल्लो समय नोटको अभाव र पुराना नोटहरूको अवस्था खराब हुँदै गएको गुनासो बढिरहेका बेला यो कदम चालिएको हो । नयाँ नोटको डिजाइन, छपाइ र आपूर्तिमा उच्च गुणस्तर र सुरक्षाको सुनिश्चितता गर्न राष्ट्र बैंकले अन्तर्राष्ट्रिय स्तरका कम्पनीहरूलाई प्राथमिकता दिएको छ ।
बोलपत्र पेस गर्ने कम्पनीहरूले नोटको डिजाइन, सुरक्षा विशेषता र छपाइको गुणस्तरमा विशेष ध्यान दिनुपर्नेछ । राष्ट्र बैंकले सबैभन्दा कम लागत र उच्च गुणस्तरको प्रस्तावलाई प्राथमिकता दिने जनाएको छ । छनोट प्रक्रिया पारदर्शी र प्रतिस्पर्धात्मक बनाउन अन्तर्राष्ट्रिय टेन्डर आह्वान गरिएको हो ।
यो ठेक्का सम्पन्न भएपछि ५०० दरका २३ करोड थान नोट बजारमा प्रचलनमा आउनेछन्, जसले दैनिक कारोबार र नगद व्यवस्थापनमा सहजता ल्याउने अपेक्षा गरिएको छ । योसँगै नेपालको मुद्रा व्यवस्थापनमा आधुनिकता र विश्वसनीयता थपिने विश्वास गरिएको छ ।
