काठमाडौं, चैत्र १६, २०८१
नेपाल पत्रकार महासंघले शुक्रबार तीनकुनेमा भएको हिंसात्मक प्रदर्शनका क्रममा एभिन्युज टेलिभिजनका पत्रकार सुरेश रजकको हत्या भएको घटनाप्रति कडा आपत्ति जनाउँदै दोषीमाथि कारबाहीको मागसहित देशव्यापी आन्दोलनको घोषणा गरेको छ। महासंघले यो हत्यालाई सुनियोजित र षड्यन्त्रपूर्ण भन्दै सत्यतथ्य छानबिन, दोषीमाथि कारबाही र पीडित परिवारलाई राहतको व्यवस्था गर्न सरकारसँग माग गरेको छ।
शनिबार बिहान बसेको महासंघको केन्द्रीय कार्यसमितिको आकस्मिक बैठकले पत्रकार रजकको हत्या, सञ्चारकर्मीमाथिको आक्रमण र मिडियामाथिको हिंसाको विरोधमा आइतबारदेखि तीन दिनसम्म आन्दोलन गर्ने निर्णय गरेको छ। महासचिव रामप्रसाद दाहालले जानकारी दिएअनुसार आन्दोलनका कार्यक्रमहरू निम्नानुसार छन्:
आन्दोलनका कार्यक्रमहरू
- आइतबार: देशभरका पत्रकारहरूलाई कार्यस्थलमा कालोपट्टी बाँधेर काम गर्न आह्वान गरिएको छ। साथै, शनिबार नै महासंघले आक्रमणमा परेका सञ्चारगृहहरूको स्थलगत अवलोकन र निरीक्षण गर्ने, पीडित, प्रत्यक्षदर्शी र पीडित परिवारसँग छलफल गर्ने निर्णय गरेको छ।
- सोमबार: महासंघको केन्द्रीय समितिले संघीय सरकारका गृहमन्त्रीलाई, प्रदेश समितिहरूले प्रदेश गृहमन्त्रीलाई र जिल्ला शाखाहरूले प्रमुख जिल्ला अधिकारीमार्फत सरकारलाई एकैसाथ ज्ञापनपत्र बुझाउने।
- मंगलबार: घटनाबारे सञ्चारगृहका सम्पादक र सरोकारवाला सङ्घसङ्गठनका नेताहरूसँग छलफल गर्ने।
अध्ययन कार्यदल गठन
महासंघले शुक्रबारको घटनाको अध्ययन गर्न उपाध्यक्ष उमिद बाग्चन्दको संयोजकत्वमा ७ सदस्यीय कार्यदल गठन गरेको छ। कार्यदलमा सचिवहरू रमेश खतिवडा, प्रकाश धौलाकोटी, सोनी शर्मा, अशोक तिवारी, वैकुण्ठ पराजुली र सविन प्रियासन सदस्य छन्। यो कार्यदलले घटनाको सत्यतथ्य पत्ता लगाई प्रतिवेदन बुझाउने जिम्मेवारी पाएको छ।
पीडित परिवार र सञ्चार संस्थाप्रति जिम्मेवारी
महासंघले पत्रकार सुरेश रजक कार्यरत एभिन्युज टेलिभिजनलाई उनको परिवारलाई राहत, क्षतिपूर्ति र बाँकी सेवासुविधा उपलब्ध गराउन ध्यानाकर्षण गराउने निर्णय गरेको छ। साथै, घटनामा संलग्न प्रदर्शनकारीहरूले कार्यस्थलमा खटिएका रजकलाई आगजनीमा पारेर हत्या गरेको भन्दै महासंघले यो घटनालाई प्रेस स्वतन्त्रतामाथिको ठाडो आक्रमणको रूपमा लिएको छ।
महासंघको अपिल
महासंघले यो घटनालाई गम्भीर रूपमा लिएको र दोषीहरूलाई कानुनी कारबाहीको दायरामा ल्याउन सरकारसँग जोडदार माग गरेको छ। साथै, देशभरका पत्रकार र सञ्चारकर्मीलाई एकजुट भएर प्रेस स्वतन्त्रता र पेशागत सुरक्षाको पक्षमा उभिन अपिल गरेको छ। शुक्रबारको हिंसामा रजकको मृत्युसँगै अन्य सञ्चारकर्मीमाथि आक्रमण र मिडिया हाउसहरूमा तोडफोड भएको थियो, जसले पत्रकारिता क्षेत्रमा ठूलो आक्रोश पैदा गरेको छ।
यो आन्दोलनले सरकार र सम्बन्धित निकायलाई पत्रकारको सुरक्षा र प्रेस स्वतन्त्रताको ग्यारेन्टी गर्न दबाब सिर्जना गर्ने अपेक्षा गरिएको छ।
