काठमाडौं, चैत्र १६, २०८१
राप्रपा नेपालका अध्यक्ष कमल थापाले शुक्रबार राजावादी प्रदर्शनमा भएको हिंसासँग पूर्वराजा ज्ञानेन्द्र शाहलाई जोड्नु अनुपयुक्त र अनावश्यक भएको बताएका छन्। सामाजिक सञ्जालमार्फत आफ्नो धारणा राख्दै उनले हिंसा, अराजकता वा आपराधिक घटनामा संलग्न नरहेका राप्रपाका नेताहरू धवल शमशेर राणा, रवीन्द्र मिश्र, नवराज सुवेदी र स्वागत नेपालको तत्काल रिहाइको माग गरेका छन्।
“हिजोको घटना वा कुनै दल वा समूहले गर्ने कार्यसँग राजालाई जोड्न खोज्नु सर्वथा अनुपयुक्त र अनावश्यक छ,” थापाले लेखेका छन्। उनले पार्टी कार्यालय, निजी घर, सुपरमार्केट र सरकारी कार्यालयमा भएको तोडफोड र आगजनी निन्दनीय भएको उल्लेख गर्दै कुनै पनि बहानामा हिंसा र अराजक गतिविधि समर्थन गर्न नसकिने स्पष्ट पारे।
हिंसाको निन्दा र छानबिनको माग
थापाले प्रदर्शनका क्रममा प्रहरीको गोलीबाट कीर्तिपुरका सविन महर्जन र आगलागीमा परेर एभिन्युज टेलिभिजनका पत्रकार सुरेश रजकको मृत्यु भएको घटनालाई जघन्य अपराधको संज्ञा दिए। “यो घटनाको निष्पक्ष छानबिन हुनुपर्छ र दोषीलाई कारबाही गर्नैपर्छ,” उनले भने।
सरकार र प्रहरीमाथि प्रश्न
थापाले हिंसा भड्किनुमा प्रहरीको भूमिकामाथि पनि प्रश्न उठाएका छन्। “निजी घरमा पसेर प्रहरीले जुलुसमा किन अन्धाधुन्ध अश्रुग्यास प्रहार गर्यो? कार्यक्रम शुरू हुनुअघि मञ्चमा किन अश्रुग्यास हानियो? सामान्य झडपमा अनावश्यक बल प्रयोग गरेर भीडलाई किन उत्तेजित बनाइयो? परिस्थिति जटिल छ भन्ने पूर्वसूचना हुँदाहुँदै किन सतर्कता अपनाइएन?” उनले प्रश्न गरे। उनले यो आन्दोलनलाई बदनाम गर्न वा तुहाउन सरकारी वा अन्य कुनै पक्षबाट षड्यन्त्र भएको हुन सक्ने आशङ्का पनि व्यक्त गरे।
शान्तिपूर्ण आन्दोलनको प्रतिबद्धता
“भ्रष्ट व्यवस्था र शासकबाट मुक्ति तथा हिन्दुराष्ट्र र राजसंस्थाको पुनःस्थापनाको पक्षमा आगामी दिनमा शान्तिपूर्ण ढङ्गबाट हामी अघि बढ्नेछौं,” थापाले भने। उनले शुक्रबारको घटनाबाट पाठ सिकेर राष्ट्रवादी आन्दोलनलाई सशक्त बनाउनुपर्ने र हिन्दुराष्ट्र तथा राजसंस्था पक्षधरलाई विचलित नहुन आह्वान गरे।
सरकारलाई चेतावनी र अपिल
थापाले यो घटनालाई अतिरञ्जित बनाएर हिन्दुराष्ट्र र राजसंस्थाको आन्दोलन दबाउन खोजिए त्यसले परिस्थिति थप जटिल बनाउने चेतावनी दिए। “हिजोको प्रदर्शनले केही अप्रिय घटनाबीच पनि हिन्दुराष्ट्र र राजसंस्थाको पक्षमा जनलहर बढ्दो र सशक्त भएको तथ्य उजागर गरेको छ,” उनले भने। उनले जनताको परिवर्तित चाहनाको सम्मान गर्दै वार्तामार्फत सबै विचार र शक्ति अटाउने निकास खोज्न सम्बद्ध पक्षसँग अपिल गरे।
थापाले यो घटनालाई भ्रष्ट व्यवस्था र शासकका ज्यादती लुकाउन प्रयोग गर्न नसकिने र राजसंस्थासहितको प्रजातन्त्रको विचारलाई दबाउन खोजिए त्यो असफल हुने दाबी गरे। उनले भविष्यमा यस्ता घटना दोहोरिन नदिन आयोजक र सरकार दुवै संयमित हुनुपर्नेमा जोड दिए।
