रिपब्लिकन राष्ट्रपति उम्मेदवार डोनाल्ड ट्रम्पले आफ्नो जीवनमा इरानबाट ठूलो खतरा रहेको दाबी गरेका छन्। उनले अमेरिकी गुप्तचर निकायहरूले इरानबाट आफ्नो हत्या गर्ने योजना बनिरहेको भन्दै चेतावनी दिएको खुलासा गरेका छन्। ट्रम्पका अनुसार इरानले यसअघि पनि हत्या प्रयास गरेको तर असफल भएको थियो। उनले इरानले फेरि प्रयास गर्ने सम्भावना रहेको र यसका लागि सुरक्षामा निकै कडाइ गरिएको बताएका छन्।
ट्रम्पले आफ्नो सामाजिक मिडिया प्लेटफर्म ट्रुथमा लेख्दै भने, “मेरो जीवनमा इरानबाट ठूलो खतरा छ। सबै सुरक्षा निकायहरूले यसलाई गम्भीरताका साथ हेरेका छन् र कुनै पनि घटनालाई रोक्न तयारी अवस्थामा रहेका छन्।” उनले इरानले उनलाई पहिल्यै निशाना बनाउन खोजेको भए पनि सफल नभएको बताउँदै थपे, “अब म पहिले कहिल्यै नदेखिएको सुरक्षा घेरामा छु।”
यस घटनालाई मध्यनजर गर्दै अमेरिकी गुप्तचर निकायहरूले ट्रम्पमाथि हुने कुनै पनि आक्रमणलाई रोक्न सतर्कता बढाएको छ। ट्रम्पको प्रचार टोलीले पनि अमेरिकी गुप्तचर निकायहरूले ट्रम्पको जीवनमा ‘वास्तविक र विशिष्ट’ खतरा रहेको चेतावनी दिएको पुष्टि गरेको छ। यद्यपि, यस खतरा पुरानो हो कि नयाँ भन्ने विषयमा भने थप विवरण दिइएको छैन।
इरानले यस आरोपलाई अस्वीकार गर्दै कुनै पनि प्रकारको हत्या योजना नभएको बताएको छ। यसअघि, इरानले अमेरिकी पूर्वराष्ट्रपति डोनाल्ड ट्रम्पमाथि निशाना बनाएको भन्ने आरोपहरूलाई खारेज गरेको थियो। ट्रम्पमाथि यो आरोप त्यतिबेला आएको हो जब इरानसँग अमेरिकाको तनाव चर्किरहेको थियो, विशेष गरेर इरान समर्थित हिजबुल्लाह र इजरायलबीचको युद्धको दौरान।
गत गृष्ममा पेन्सिल्भेनियामा भएको एक र्यालीमा ट्रम्पमाथि आक्रमणको प्रयास भएको थियो, जसमा एक व्यक्तिको मृत्यु भएको थियो। त्यसपछि अमेरिकी सञ्चारमाध्यमहरूले इरानलाई ट्रम्पको हत्या षड्यन्त्रमा संलग्न भएको भन्दै रिपोर्ट गरेका थिए। ट्रम्पले आफ्नो सामाजिक मिडियामा भनेका थिए, “यदि ममाथि आक्रमण भयो भने म आशा गर्छु कि अमेरिकाले इरानलाई पूरै नष्ट गर्नेछ।”
हालका सर्वेक्षणहरूमा ट्रम्पको लोकप्रियता बढिरहेको देखिएको छ। यस्तो अवस्थामा ट्रम्पको जीवनमा आएको खतरा अमेरिकी राष्ट्रपति चुनावमा पनि गम्भीर प्रभाव पार्न सक्ने अनुमान गरिएको छ। अमेरिकामा आगामी नोभेम्बरमा हुने निर्वाचनको लागि यो विषयले चर्चा पाएको छ।
इरानी साइबर आक्रमणकारीहरूले पनि ट्रम्पको प्रचार टोलीलाई निशाना बनाएको आरोप लगाइएको छ, जसले सन् २०२४ को अमेरिकी निर्वाचनलाई प्रभावित गर्ने सम्भावना देखिएको छ। इरानले भने यी सबै आरोपलाई अस्वीकार गर्दै अमेरिकी सञ्चारमाध्यमहरूले गलत सूचना फैलाएको आरोप लगाएको छ।
अमेरिकी गुप्तचर निकायहरूले भने इरानसँग सम्बन्धित यी खतराहरूलाई गम्भीरताका साथ लिँदै ट्रम्पको सुरक्षा प्रणालीलाई अझ कडा बनाएको जनाइएको छ।
ePress Media, असोज ९, २०८१
