काठमाडौं: नेपाली काँग्रेस र नेकपा एमालेबीचको अप्रत्याशित गठबन्धनबाट बनेको नयाँ सरकारको स्थायित्वलाई लिएर नागरिकहरूले मिश्रित प्रतिक्रिया जनाएका छन्। असार १७ गते राति सत्ता साझेदारीका रूपमा सहमति भएपछि यो नयाँ समीकरणको बारेमा जनताको धारणा विभाजित देखिएको छ।
काँग्रेस र एमालेको संयुक्त सरकारले आम नागरिक, व्यवसायी, राजनीतिकर्मी, र शिक्षक–प्राध्यापकमा आशा र आशंका दुवै उत्पन्न गरेको छ। केहीले यो सरकारलाई स्थायित्व ल्याउने र विकासको सकारात्मक परिणाम दिने विश्वास राखेका छन् भने अन्यले यसलाई ‘अवसरवादी’ र ‘अस्थिर’ ठानिरहेका छन्।
विगतमा कम्युनिस्ट दलहरूको एकता गर्दा अपेक्षित परिणाम हासिल नभएको अनुभवले अहिले दुई फरक विचारधाराका दलहरूको गठबन्धनबाट ठूलो अपेक्षा नगर्न सकिने गुनासो व्यक्त गरिएको छ।
पछिल्ला केही वर्षमा प्रत्येक चारदेखि ६ महिनामा सत्ता परिवर्तन भएको घटनाले राजनीतिक अस्थिरता उत्पन्न गरेको छ। काँग्रेस र एमालेको गठबन्धनले स्थायित्व ल्याउने अपेक्षा राख्दै यसले नीतिगत रूपले काम गर्ने वातावरण सिर्जना गर्नुपर्ने व्यवसायीहरूको माग छ।
जनताको जीवनस्तर सुधार्ने कामलाई प्राथमिकता दिनुपर्ने सुझाव दिँदै नेकपा (एकीकृत समाजवादी) का युवा नेता वसिम आलमले यो विषय भाषणमा सीमित नगरी, वास्तविक काममा लाग्नुपर्ने बताए।
संसदीय निर्वाचनपछि बनिरहेका सरकारहरूमा यो चौथो गठबन्धन हो। राजनैतिक दलहरूको सत्तासँगको प्रतिस्पर्धाले स्थायी सरकारको अभाव देखाएको छ भने अहिले दुई ठूला दलहरूको नेतृत्वमा बनेको सरकारबाट केही आशा र केही आशंका व्यक्त गरिएको छ। विराटनगरस्थित महेन्द्र मोरङ आदर्श बहुमुखी क्याम्पसकी प्राध्यापक इन्दिरा प्रसाईंले यस सरकारलाई सैद्धान्तिक दृष्टिले सही ट्र्याकमा देखेकी छन्।
राष्ट्रिय हितका लागि बनेको यो नयाँ सरकारले जनताको विश्वास जित्न सक्छ कि नसक्ने भन्ने कुरा यसको भविष्यको निर्धारण गर्नेछ।
