काठमाडौं— नेपाल राष्ट्र बैंकले सार्वजनिक गरेको चालू आर्थिक वर्षको पहिलो महिनाको आर्थिक तथा वित्तीय स्थिती प्रतिवेदनअनुसार चालु खाता बचतमा ३० अर्ब ८९ करोड पुगेको छ। अघिल्लो वर्षको सोही अवधिमा यो रकम १३ अर्ब ३७ करोड बचतमा थियो, जसले गर्दा यस वर्षको वृद्धि उल्लेखनीय मानिएको छ।
रेमिट्यान्स प्रवाहको वृद्धि यस सकारात्मक परिणामको मुख्य कारण भएको राष्ट्र बैंकले जनाएको छ। यस अवधिमा रेमिट्यान्स प्रवाह २० प्रतिशतले बढेको देखिएको छ, जसले समग्र चालु खाता तथा शोधनान्तर स्थितिमा सुधार ल्याएको हो। समीक्षा अवधिमा प्रत्यक्ष वैदेशिक पुँजी लगानी ७९ करोड ९८ लाख कायम भएको छ। यो अघिल्लो वर्षको तुलनामा केही कमी देखिए तापनि समग्र आर्थिक सूचकाङ्कमा सुधार आएको राष्ट्र बैंकको प्रतिवेदनले जनाएको छ।
विदेशी विनिमय सञ्चिति र शोधनान्तर स्थिति सुधार
समीक्षा अवधिमा शोधनान्तर स्थिति ४० अर्ब ९० करोडले बचतमा रहेको छ। अघिल्लो वर्षको सोही अवधिमा यो ३६ अर्ब ४३ करोड बचतमा थियो, जसले गर्दा यस वर्षको वृद्धि उल्लेख्य छ। अमेरिकी डलरको मूल्यमा शोधनान्तर स्थिति ३० करोड ५१ लाख पुगेको छ।
विदेशी विनिमय सञ्चितिमा पनि २.५ प्रतिशतले वृद्धि भएको छ। साउन मसान्तमा कुल विदेशी विनिमय सञ्चिति २०९२ अर्ब २२ करोड रहेको छ, जसमा अमेरिकी डलरमा १५ अर्ब ५८ करोड पुगेको छ। यसमा नेपाल राष्ट्र बैंकको सञ्चिति १८८३ अर्ब ४२ करोड पुगेको छ, जबकि बैंक तथा वित्तीय संस्थामा ८.४ प्रतिशतले वृद्धि भई २०८ अर्ब ७९ करोड पुगेको छ।
कुल विदेशी विनिमय सञ्चितिमा भारतीय मुद्राको अंश २२.६ प्रतिशत रहेको राष्ट्र बैंकले उल्लेख गरेको छ।
अन्तर्राष्ट्रिय स्तरमा स्थायित्व कायम राख्न चालु खाता, शोधनान्तर स्थिति, र विदेशी विनिमय सञ्चितिमा आएको सुधार नेपालका लागि आर्थिक दृष्टिले महत्वपूर्ण उपलब्धि हो।
epress media
असोज १०, २०८१
